爸，你終於都走了，我以為我可以坦然面對，但原來唔得，我完全承受唔到，我好辛苦。
對唔住，我從來無好好珍惜過你，由細到大只會同你嗌交，直到你病咗我先開始懂得同你溝通。
我知道你放唔低我哋幾個，放唔低間公司，擔心我哋以後生活，但你可以放心，我應承你我哋會好好生活落去，會照顧好呀媽，公司我會盡最大努力去經營，將來會有 30 週年，40 週年⋯⋯
爸，我有兩句說話想對你講：
1）對唔住：我一直無同你好好相處，由細個你打爛我架單車開始，我就嬲咗你，加上你成日唔返屋企，從來無同我哋相處，所以一直都無和好。另一個對唔住，係我仲未能夠事業有成，養你同呀媽，我住嘅，食嘅，全部都要靠你，我知我無用。
2）多謝你：我要多謝你養大我，包容我，供書教學，畀我去外國讀書，送咗一段好珍貴嘅經歷同回憶畀我，即使我無讀上大學。
爸，我會掛住你的，每次諗起你我都會忍唔住喊，唔知幾時先會好呢？如果呢個世界有如果，如果我無送你入院，如果我接你出院時有幫你著多啲衫，戴好口罩，結果會唔會一樣？你係咪唔想我地洗錢幫你醫病你先走得咁快？你知唔知好多人都唔捨得你，雖然你把口臭成日得罪人，但心底裡大家都好敬重你，掛住你。
希望你喺另一個世界會安好，我哋喺天家再聚。
撰文：TONY
＿＿＿＿＿＿＿＿＿＿＿＿＿＿＿＿＿＿＿
活過不白過
Follow us on IG：https://bit.ly/2yjkquY
Tags :
讀者投稿
