相信有好多人都經歷過一段，埋藏喺心入面，好難忘而有緣無份嘅愛情故事。
想藉著呢篇文章，好好咁多謝你，好好咁話別同送上祝福。
幾年前，曾經以為同你可以踏入人生另一階段，執子之手，與子偕老。
但世事往往就不如人意，一旦愛情入面失去咗信任，就變得一切都無意義。
即使你多番道歉，挽救，已經於事無補。我一直以原諒你嘅角度出發，但發現自己真係完全接受唔到被背叛，不忠嘅事實。相信你都唔想每日返到屋企，見到終日疑神疑鬼嘅老婆吧。當時嘅震撼場面，我無好好咁同你傾談，好好咁同你話別。
我想講嘅係，我對你無憎恨，亦都有自我檢討，我嘅脾氣、野蠻，同對你甚少嘅讚美，相處咗 10 年日常生活入面，大家都變得老奉，缺乏為對方製造驚喜。始終一隻手掌拍唔響，演變成大家分開嘅結果，我都有責任。
多謝你呢 10 年嚟一直嘅陪伴，你我都有付出過，不枉過。我絕對唔後悔同你一齊咁多年嚟嘅日子，因為真係好開心，亦係我人生嘅一部份。
雖然唔知道你有冇機會睇到呢篇文章，但希望你唔好再太過內疚自責，偶然我都會夢見你同世伯伯母，仲有狗狗。知道你依家終於有段認真嘅感情，好想喺呢度送上祝福，衷心希望你同我，各自同彼此嘅伴侶，一定要繼續幸福落去。你心底裡係一個好好嘅人。
同時想提點大家，幸福並唔係必然，請好好珍惜現時所擁有嘅任何家人、愛人、朋友、事物。多啲讚美對方，而「愛」真係要講出口，唔好令自己後悔。
若果世界上真係有平行時空，希望我哋嘅愛會喺另一個時空入面延續，繼續一直相愛落去吧！
Z樣上
圖片：unsplash
＿＿＿＿＿＿＿＿＿＿＿＿＿＿＿＿＿＿＿
活過不白過
Follow us on IG：https://bit.ly/2yjkquY
Tags :
讀者投稿
